बाजुरा– बाजुराको सरदमुकाम मार्तडीमा दुई करोड लगानीमा निर्माणाधीन बहुउद्देश्यीय कभर्ड हल बनाउन आठ वर्ष लागेको छ । २०७३ सालमा निर्माण कार्य सुरु गरिएको बहुउद्देश्यीय कभर्ड हलको अलपत्र परेपछि बडिमालिका नगरपालिकाको लगानीमा निर्माण गरिएको हो । बहुउद्देश्यीय कभर्ड हल भनेर नाम दिइएको भए पनि निर्माण पूरा नहुँदा आठ वर्षदेखि अलपत्र परेको थियो ।

जिल्लाको सदरमुकाममै कभर्ड हल अलपत्र परेपछि बडिमालिका नगरपालिकाले २५ लाख बजेट विनियोजन गरी निर्माण गरिएको बडिमालिका नगरपालिकाका नगर प्रमुख अमरबहादुर खड्काले बताए । कभर्ड हलको २०७३ वैशाख ११ गते तत्कालीन उपप्रधान तथा रक्षामन्त्री भीम रावलले शिलान्यास गरेका थिए ।

संविधानसभा सदस्य तथा तत्कालीन उद्योगमन्त्री कर्णबहादुर थापाको संसद् विकास कोषबाट बजेट विनियोजन गरी निर्माणको थालनी गरिएको थियो । २०७३ सालमा संविधानसभा सदस्य कर्णबहादुर थापाको संसद् विकास कोषबाट ५० लाख विनियोजन भएर निर्माण कम्पनीले इस्टिमेट अनुसारको काम नगरेको जिल्ला खेलकुद समितिको तथ्याकंमा उल्लेख छ ।

२०७४ सालमा खेलकुद परिषद्बाट ४० लाख, २०७५ सालमा खेलकुद परिषद्बाट पुनः ४० लाख गरी ८० लाख र २०७५ मा सांसद लालबहादुर थापाको संसद् विकास कोषबाट ४५ लाख विनियोजन भएको भए पनि ठेकदारको लापरबाहीका कारण काम हुन नसकेको खेलकुद विकास समितिले जनाएको छ ।

त्यसैगरी २०७६ सुदूरपश्चिम प्रदेश खेलकुद परिषद्बाट ५० लाख विनियोजन गरी निर्माण व्यवसायी रामप्रसाद रेग्मीले जिम्मा लिए, इस्टिमेटअनुसारको काम देखाएर सबै रकम निकासा भयो तर काम पूरा नगरेको खेलकुद समितिका अध्यक्ष राकेश थापाको भनाइ छ ।

कभर्ड हल निर्माणकै लागि संघ प्रदेश र स्थानीय सरकारबाट आठ वर्षमा दुई करोड बढी बजेट खर्च भइसकेको छ । तर पनि कभर्ड हल अहिले जीर्ण बन्दै गएपछि नगरपालिकाले निर्माणको ठेक्का आह्वान गरेर निर्माण गरेको इन्जिनियर शेरबहादुर बुढाले बताए । रकम अभावकै कारण कभर्ड हल निर्माणकार्य बीचमै अलपत्र परेको जिल्ला खेलकुद विकास समिति बाजुराका अध्यक्ष राकेश थापाले बताए ।