पूर्णरुपमा तन्दुरुस्त रहनका लागि दिनहुँ कति घण्टाको निद्रा आवश्यक पर्छ भनेर सोध्यो भने सायद हामी कसैको जवाफ ८ घण्टा होला, कसैको ६ घण्टा हुनसक्छ र कसैले त आफ्ना लागि २ घण्टाकै निद पर्याप्त हुने जवाफ दिनपनि सक्छ । तर, जापानमा एकजना व्यक्तिले आफू पछिल्लो १२ वर्षदेखि हरेक दिन केवल ३० मिनेट मात्रै सुत्ने गरेको दाबी गरेका छन् । यो सुन्दा हामीलाई अचम्म लाग्नसक्छ ।

डायसुके होरी नामका ती व्यापारीको उमेर ४० वर्ष छ । उनी पूर्ण रुपमा स्वस्थ तथा तन्दुरुस्त छन् । तर, हरेक दिन केवल आधा घण्टा मात्रै सुत्दछन् । आखिर त्यति कम निद्रा पर्दा समेत उनी त्यतिधेरै सक्रिय छन् कि मानिसहरु अचम्ममा पर्दछन् । आफुले आफ्नो मष्तिस्क र शरीरलाई कम निद्राका लागि पूर्णरुपमा प्रशिक्षित गरेको उनी बताउँछन् ।

आखिर उनी दैनिक केवल आधा घण्टा सुत्नुको कारण के हो ? वास्तवमा आफ्नो दैनिक जीवनमा धेरैभन्दा धेरै समय काम गर्न पाइयोस् भनेर उनले सुत्ने समयलाई व्यापक रुपमा कटौती गरेका हुन् ।

साउथ चाइना मर्निंग पोष्टका अनुसार होरीले १२ वर्षअघि कम सुत्ने बानीको विकास गरेका थिए । सन् २०१६ मा उनले जापान शर्ट स्लिपिंग एसोसिएसन (कम सुत्ने जापानीहरुको संस्था) नै गठन गरे । त्यहाँ उनले मानिसहरुलाई स्वास्थ्य तथा निद्रासँग सम्बन्धित कक्षाहरु प्रदान गर्दछन् ।

केवल आधा घण्टामात्रै सुत्ने होरीले दिनमा १ घण्टा त जिमखानामै बिताउँछन् । जापानको योमियुरी टिभीले होरीको दैनिक जिवनयापनका बारेमा एउटा कार्यक्रम प्रसारण गरेको छ । जसमा ३ दिनसम्म होरीको क्रियाकलापहरु देखाइयो । त्यस त्रममा होरी हरेक दिन केवल २५ देखि ३० मिनेटसम्म मात्रै सुतेका थिए ।

स्लीपर्स ट्रेनिंग एसोसिएसनमा होरीले अहिलेसम्म २१ सय युवाहरुलाई कम समयसम्म मात्रै सुतेर जिउने कला सिकाएका छन् । यदि जीवनमा कुनै खेल खेल्ने बानी बसाल्न सकेमा कम निद्रा सुत्नु पनि कुनै अप्ठेरो काम होइन । यस्तो जीवनशैली अपनाउनु झनै लाभदायी सावित हुने उनी बताउँछन् । होरीले खाना खानु एक घण्टाअघि कफी पिउँछन् । जसले गर्दा उनलाई निद्रा र थकानको सामना गर्नु पर्दैन ।