वाग्मती प्रदेश प्रमुख यादवचन्द्र शर्माले प्रदेशसभामा नवनिर्वाचित उपसभामुख अप्सरा चापागाइँलाई आज पद तथा गोपनियता शपथ गराउनुभएको छ । सो अवसरमा वाग्मती प्रदेशका मुख्यमन्त्री शालिकराम जम्मकट्टेल, सभामुख भुवनकुमार पाठक, सरकारका प्रवक्ता एवं आर्थिक मामिला तथा योजनामन्त्री जगन्नाथ थपलिया र बिना विभागीयमन्त्री उद्धब थापा उपस्थित हुनुहुन्थ्यो ।

नवनिर्वाचित उपसभामुख चापागाइँले आजै प्रदेशसभा सचिवालय गएर कार्यभार सम्हाल्नुभयो सोमबार बसेको प्रदेशसभाको बैठकले उहाँलाई उपसभामुख पदमा निर्वाचित गरेको थियो । नवनिर्वाचित उपसभामुख चापागाइँले विसं २०४५ सालदेखि काभ्रेको पनौतीबाट तत्कालीन नेकपा (माले)को साधारण सदस्यता प्राप्त गरी राजनीतिक जीवन सुरु गर्नुभएकामा पछि नेकपा (एमाले) वाग्मती कमिटीको सदस्य र कार्यालय सचिव हुनुभयो । सोही पार्टीको जनवर्गीय सङ्गठनको महिला सङ्घ र वन तथा वातावरण क्षेत्रमा भूमिका निर्वाह गरिएको पनि उहाँले जानकारी दिनुभयो ।

चापागाइँ विद्यार्थी जीवनमा पनि अध्ययनका साथै विद्यार्थी राजनीतिबाट सक्रिय हुँदै आउनुभएको थियो ।समानुपातिक प्रदेशसभा सदस्य हुनुहुन्छ ।