१९ चैत्र, काठमाडाैँ । राष्ट्रिय स्वतन्त्र पार्टीका सभापति रवि लामिछानेविरुद्ध युवराज पौडेल ‘सफल’ पुनः सर्वोच्च अदालत गएका छन् । लामिछानेविरूद्ध रिट लिएर सफल पुनः सर्वोच्च गएका हुन्।

उनि अमेरिकी नागरिक नै रहेको अवस्था नेपालको राहदानी लिएको विषयमा लामिछानेमाथि मुद्दा दायर गर्न माग गर्दै सर्वोच्च पुगेको बताइएको छ ।

आफू अमेरिकी नागरिक हुँदा हुँदै नेपाली नागरिक हुँ भन्नु र पासपोर्ट निवेदन फारम भरी नेपाली राहदानी प्राप्त गर्नु राहदानी ऐन, २०२४ को दफा ५(ख) विपरीतको कार्य र कसुर हो भन्ने कुरामा विवाद नहुँदा नहुँदै महान्यायाधिवक्ताले मुद्दा नचलाउने निर्णय गर्नु निमयसम्मत नभएको उनले दाबी गरेका छन् ।

गत मंसिरमा भएको निर्वाचनमा चितवन २ बाट निर्वाचित लामिछाने नागरिकता प्रकरणमा दोषी सावित भएसँगै उनको सांसद पद खारेज भएको थियो । सोही क्षेत्रमा आगामी १० वैशाखमा उपनिर्वाचन हुँदैछ ।

लामिछानेले सोही क्षेत्रबाट चुनाव लड्नका लागि राष्ट्रिय स्वतन्त्र पार्टीबाट उम्मेदवारको टिकट पाइसकेका छन् ।