९ चैत्र, एजेन्सी । भारतीय विपक्षी नेता राहुल गान्धीलाई स्थानीय अदालतले आपराधिक मानहानि मुद्दामा दुई वर्षको जेल सजाय सुनाएको छ ।

गान्धीलाई गुजरात राज्यको अदालतले २०१९ मा चुनावी र्‍यालीमा प्रधानमन्त्री नरेन्द्र मोदीको उपनामको बारेमा टिप्पणी गरेकोमा दोषी ठहर गरेको हो ।

गान्धिलाई तत्काल जेल नलगिने बताइएको छ । उनले ३० दिनको जमानत पाएको र  अदालतको आदेश विरुद्ध अपील गर्न सक्ने भारतीय मिडियाहरूले उल्लेख गरेका छन् ।

न्यायाधीशले फैसला सुनाउँदा कांग्रेस सांसद अदालतमा थिए ।

२०१९ को आम चुनाव अघि कर्नाटक राज्यमा एक चुनावी र्‍यालीमा बोल्दै गान्धीले सबै चोरहरूको उपनाम किन ‘मोदी छ’ भनेका थिए । उनले भगोड़ा हीरा व्यवसायी नीरव मोदी र पूर्व इन्डियन प्रिमियर लिगका अध्यक्ष ललित मोदी लक्षित यो अभिव्यक्ति दिएको बताइएको छ ।

भारतको सत्तारुढ भारतीय जनता पार्टीका सांसद पूर्णेश मोदीको उजुरीको आधारमा मुद्दा दायर गरिएको थियो। उनले गान्धीको टिप्पणीले सम्पूर्ण मोदी समुदायलाई बदनाम गरेको बताएका थिए ।

गान्धीका वकिलहरूले मुद्दामा सही कानुनी प्रक्रियाहरू पालना नगरिएको तर्क गरेका छन् । उनीहरूले गान्धीको भाषणको निशाना पूर्णेश मोदी नभएकाले नरेन्द्र मोदीले नै उजुरी गर्नुपर्ने तर्क समेत राखेका थिए ।

कांग्रेस पार्टीले ट्वीट गर्दै गान्धीले अपील दायर गर्ने र मुद्दा जित्ने उल्लेख गरेको छ ।

गान्धीले अहिलेसम्म सार्वजनिक रूपमा टिप्पणी गरेका छैनन् तर महात्मा गान्धीको हिन्दीमा एउटा उद्धरण ट्वीट गरेका छन्। जसमा लेखिएको छ, “मेरो धर्म सत्य र अहिंसामा आधारित छ। सत्य मेरो भगवान हो, र अहिंसा यसलाई प्राप्त गर्ने माध्यम हो।”