बाजुरा: बाजुरामा भालुकाे आक्रमणबाट एकजना गम्भीर घाइते भएका छन् । घाइते हुनेमा जिल्लाको खप्तड छेडेदह गाउँपालिका वडा नम्बर ३ धुर्ताेला बस्ने अन्दाजी ३५ बर्षका रणबहादुर रावत रहेका छन् ।
मंगलबार दिउँसो स्याउला बटुल्ने क्रममा घर नजिकैको जंगलमा भालुकाे आक्रमणबाट रावत गम्भीर भएको जिल्ला प्रहरी कार्यालय बाजुराका प्रमुख डिएसपी दिलीपकुमार गिरीले बताएका छन् । उनका अनुसार भालुले रावतकाे टाउको, मुख, छाती र बायाँ हात चुडेकाे र अवस्था गम्भीर रहेको छ । गम्भीर घाइते युवकलाई स्थानीय र प्रहरीले लगत्तै अछामको बयालपाटा अस्पतालमा पुर्याएर उपचार भइरहेको जनाएको छ ।