९ चैत्र, एजेन्सी। भारतीय गायक सोनु निगमको घरबाट मोटो रकम चोरी भएको छ । उनको घरबाट ७२ लाख चोरी भएको भारतीय मिडियाहरूले उल्लेख गरेका छन् ।

यस घटनामा उनका पुर्व ड्राइभर अगम कुमारको संलग्नता भएको प्रहरीको अनुमान छ । सोही आरोपमा उनलाई गिरफ्तार गरेर अनुसन्धान समेत सुरू गरिएको छ ।

सोनुकी बहिनी निकिताले मुम्बई प्रहरीमा उजुरी दिए पछि यो घटना सार्वजनिक भएको हो । अगमकुमारले सोनु निगमको चालकको रूपमा ८ महिना काम गरेका थिए । राम्रो काम नगरेको भन्दै उनलाई कामबाट बिदा गरिएको थियो ।

निगमको डिजिटल लकरबाट एक दिन ४० लाख र अर्को दिन ३२ लाख हराएको प्रहरी  उजुरीमा उल्लेख छ । प्रहरीले सिसिटिभी फुटेज परीक्षण गर्दा अगमकुमारले दुवै पटक ठूलो झोलासहित निस्किएको देखिएको छ ।

त्यस्तै, अगमकुमारले रकम चोरी गरेको प्रहरीसमक्ष स्विकारेको बिबिसी हिन्दीमा उल्लेख छ ।