८ चैत्र, काठमाडाैँ । तिब्बती शरणार्थीहरूलाई नेपाली नागरिकता बनाइदिने काममा संलग्न गिरोह पक्राउ परेका छन् । प्रहरीले बुधबार काठमाडाैँ उपत्यका अपराध अनुसन्धान कार्यालय मीनभवनमा पत्रकार सम्मेलन गरेर यो विषयबारे जानकारी दिएको हो ।

प्रहरीले दिएको जानकारी अनुसार पक्राउ पर्नेमा झापाका कृष्णबहादुर कटवाल, भक्तपुरका न्युल्केश श्रेष्ठ, मोरङका हिरालाल शिवाकोटी, तनहुँका लोब्साङ ठिन्ले र ललितपुरका विजय लामा रहेका छन् ।

उनीहरूले झुठा लिखत तथा कागजात तयार पारी गैरनेपाली व्यक्तिहरूको सक्कलै नेपाली नागरिकता बनाइदिने गरेको पाइएको एसपी सोमेन्द्रसिंह राठौरले जानकारी दिए ।

पक्राउ परेकामध्ये बुबा बनेर एक पटक सनाखत गर्दा १० हजार लिने गरेको पाइएको छ । उनले यसरी ५ जनाको नागरिकता बनाएको पाइएको छ ।

उक्त गिरोहले तिब्बती शरणार्थीहरूको नागरिकता बनाउन तीनदेखि पाँच लाखसम्म लिने गरेको पाइएको छ । यही गिरोहले ६ वर्षमा पाँच सय जनाभन्दा धेरै तिब्बतीलाई नागरिकता बनाइदिएको प्रहरीले अनुमान गरेको छ ।

यस विषयका काठमाडाैँ जिल्ला प्रशासन कार्यालयका पूर्व तथा बहालवाला कर्मचारीहरूमाथि पनि अनुसन्धान भइरहेको एपसी राठाैरले जानकारी दिएका छन् ।