काठमाडौं । मकवानपुरको बकैया गाउँपालिकामा कार दुर्घटना हुँदा तीनजना गम्भीर घाइते भएका छन् । ललितपुरबाट हेटौँडातर्फ जाँदै गरेको ग ३ च ९४७५ नम्बरको टाटा कार अनियन्त्रित भई बकैया-१२ चौतारास्थित कान्ति लोकपथ सडकखण्डमा दुर्घटना भएको हो ।

कार सडकबाट करिब ४/५ सय मिटर तल खसेको जिल्ला प्रहरी कार्यालयका प्रवक्ता डीएसपी लक्ष्मी भण्डारीले जानकारी दिए । घाइते तीनैजना पुरुष रहेको तर परिचय खुल्न सकेको छैन । उनीहरुलाई अचेत अवस्थामा उद्धार गरी उपचारका लागि अस्पताल पठाइएको छ ।