काठमाडौँ । रैथाने सिपलाई उद्यमशील बनाउने, उद्यमलाई विकास गर्दै उत्पादनमा गुणस्तरीयता, आकर्षक प्याकेजिङ् तथा प्रवर्धनको चक्रबाट अन्तरराष्ट्रिय बजारमा पुर्‍याउन काठमाडौँ महानगरपालिकाले काम गरिरहेको उपप्रमुख सुनिता डंगोलले बताउनुभएको छ । निर्यातमा काम गर्न इच्छुक २० जना वडाबासीका लागि वडा नं. २३ ले आजदेखि सुरु गरेको ‘सम्भावित अन्तरराष्ट्रिय बजार पहुँच’ विषयक ५ दिने तालिम उद्घाटन गर्दै उहाँले यस्तो धारणा राख्नुभएको हो ।

‘अन्तरराष्ट्रिय बजार योग्य उत्पादन (सामान) भइकन पनि आकर्षक प्याकेजिङ् र प्रवर्धनको सिप नजानेका कारण उचित मूल्य र ठाउँ पाएका छैनन् । यस्ता उत्पादनको प्याकेजिङ्, गुणस्तर कायम गर्ने विधि, बजारीकरण सम्बन्धी सिप प्रदान गर्दा निर्यातमा प्रोत्साहन हुने हाम्रो विश्वाश हो ।’ उहाँले बताउनुभयो । स्थानीय उत्पादनलाई अन्तरराष्ट्रिय बजारमा पुर्‍याउने उद्देश्यले ‘सम्भावित अन्तरराष्ट्रिय बजार पहुँच’ विषयक तालिम सुरु भएको छ । वडा नं. २३ ले २० जना वडाबासीलाई यस सम्बन्धी ५ दिने तालिम सुरु गरेको छ ।