१० ,मङ्सिर ,काठमाडौँ । काठमाडौँको वसन्तपुरमा लैङ्गिक हिंसाविरुद्ध सचेतनामूलक कला प्रदर्शनी गरिएको छ ।

आभा फर क्रिएटिभिटीको संयोजनमा महिला हिंसाविरुद्धको १६ दिने अभियानअन्तर्गत आज वन क्षेत्रमा हुने लैङ्गिक हिंसाविरुद्ध काठमाडौँको वसन्तपुर क्षेत्रमा सचेतनामूलक कला प्रदर्शनी गरिएको हो ।

हरेक वर्ष नोभेम्बर २५ देखि डिसेम्बर १० सम्म विश्वभर मनाइने लैङ्गिक हिंसाविरुद्धको १६ दिने अभियान शनिबारदेखि सुरु भएको हो ।

‘लैङ्गिक हिंसा मानव अधिकारको हनन हो’ भन्ने विषयमा राष्ट्रिय तथा अन्तर्राष्ट्रिय रुपमा जनचेतना विस्तार गर्न नेपालले पनि हरेक वर्ष नोभेम्बर २५ तारिखमा महिला हिंसाविरुद्धको राष्ट्रिय अभियान दिवसका रुपमा मनाउने गरेको छ ।

कार्यक्रममा सामुदायिक वन उपभोक्ता महासङ्घ नेपालका अध्यक्ष ठाकुर भण्डारीले लैङ्गिक हिंसाविरुद्धको अभियानमा सचेतनामूलक नाटकका रुपमा हिंसाविरुद्ध कसरी अघि बढ्ने, कसरी न्यूनीकरण गर्ने भन्ने बारेमा सचेतना प्रवाह गरिएको बताए ।

सामुदायिक वन उपभोक्ता महासङ्घ नेपालकी महासचिव पार्वता गौतमले देशव्यापी रुपमा १६ दिने अभियान मनाइरहेको र सामुदायिक वनमा भएका लैङ्गिक हिंसाका बारेमा सचेतनामूलक कार्यक्रम गरेर देखाइएको बताए ।

कार्यतालिका बनाएर देशव्यापी रुपमा विभिन्न सचेतना फल्याउने काम गरिरहेको उहाँले जानकारी दिए ।