नेपाल भ्रमणमा रहेका जर्मन सांसदहरुको टोलीले कृषि तथा पशुपन्छि विकास मन्त्री ज्वाला कुमारी साहसँग भेट गरेका छन्।

सिंहदरबार स्थित मन्त्रालयको सभाहलमा जर्मन टोलीले मन्त्री साहसँग भेट गरेका हुन्।

नेपालका लागि जर्मन राजदूत थोमस प्रिन्ज को अगुवाइमा आएको टोलीले जर्मन र नेपालबीचको सम्बन्धलाई कृषिका माध्यमबाट कसरी थप मजबद बनाउन सकिन्छ भन्ने विषयमा कुरा गरेका थिए।

भेटमा जर्मन टोलीले नेपालको कृषि क्षेत्रको बृहत्तर विकास र प्रवर्धनका लागि जर्मन सरकारले नेपालमा सञ्चालन गर्न चाहेको शीपविकासको कार्यक्रमबारे सरकारको धारणा जान्न चाहेका थिए।

जवाफमा मन्त्री साहले २०७२ सालको भूकम्पमा जर्मनले नेपाललाई गरेको सहयोगको सधैं स्मरण रहने भन्दै कृषि क्षेत्रको उन्नयका लागि जर्मनले गर्न चाहेको सहयोग प्रशंसा गरिन्। उनले नेपाललाई कृषिको माध्यमबाट अगाडि बढाउन आफू लागेको भन्दै उक्त लक्ष्य पूरा गर्न जर्मनको सहयोगको आवश्यकता रहने बताइन्।