१२ भदाै, एजेन्सी । लगातार खोकीको सामना गर्नु कष्टप्रद र असहज दुबै हुन सक्छ । त्यस्तै, कफले मानिसको दिनचर्यामा समेत प्रभाव पारिरहेको हुन्छ ।

खोकी र कफ सामान्यता चिसो, एलर्जी वा अन्य कारणहरूले पनि निरन्तर भइरहन सक्छ । यसबाट छुटकारा पाउने धेरै व्यावहारिक र प्राकृतिक उपचारहरू छन् जुन तपाईंले आफ्नै घरमा सजिलै अपनाउन सक्नुहुन्छ ।

के छन् त खोकी र कफबाट छुटकारा पाउने उपायहरू ?

१. महको प्रयोग

दैनिक एक चम्चा महको सेवन गर्नाले खोकी र कफको समस्याबाट छुटकारा पाउन सकिन्छ । महले घाँटीमा संक्रमण गर्ने किँटाणु मार्ने भएका कारण खोकी र कफको उपचारका लागि मह प्रभावकारी मानिन्छन् । तर, १ वर्षभन्दा कम उमेरका बच्चाहरूका लागि भने मह फाइदाजनक मानिँदैन।

२. तातो पदार्थ सेवन

तातो पेय पदार्थहरू स्वास्थका लागि हर हिसाबले फाइदा जनक मानिन्छन् । अझ खोकी र घाँटीको समस्याका लागि तातो पेय पदार्थहरू अझै फाइदाजनक पुष्टि भइसकेका छन् । दैनिक तातो पानी वा चियाको सेवन खोकी र कफबाट छुटकारा पाउने अर्को प्रभावकारी घरेलु उपचार मानिन्छ ।

३. अदुवा सेवन

विभिन्न अध्ययनहरूले अदुवामा केही शुद्ध यौगिकहरूले मानिसको घाँटी तथा वायुमार्गहरूका मांसपेशीमा आराम पैदा गर्ने तत्व हुने देखाएका छन् । काँचो अदुवा वा अदुवालाई महमा मिसाएर तातो चियामा अदुवा राखेर खाँदा खोकी र कफबाट छुटकारा पाउन सकिन्छ ।

४. पर्याप्त पानी

पर्याप्त मात्रामा पानी नपिउने हो भने विभिन्न खालका स्वास्थ्य समस्याहरू निम्तिन्छन् । पर्याप्त पानी सेवन नगर्दा कफको समस्या उत्पन्न हुने पनि बताइन्छ । त्यसकारण पर्याप्त मात्रामा पानी पिउनाले धेरै स्वास्थ्य समस्याबाट छुटकारा पाइन्छन् । त्यसमा पनि मनतातो पानी भने कफ तथा खोकीको समस्याबाट छुटकारा पाउन अत्यन्तै फाइदाजनक छ ।

५. नूनपानीले कुल्ला गर्ने

नुन पानीको कुल्ला सामान्यतया घाँटी दुख्ने समस्याबाट छुटकारा पाउने उपाय हो। यसका साथै कफ र खोकीको लागि पनि यो प्रभावकारी छ । सुत्नुभन्दा अघि मनतातो पानीमा नुन हालेर कुल्ला गर्दा खोकी, घाँटी दुख्ने समस्या र कफबाट छुटकारा पाउन सकिन्छ ।