११ ,भाद्र ,काठमाडौँ । जिल्ला प्रहरी परिसर, काठमाडौंले ‘बङ्‍गुर लिई फरार’ शीर्षक राखेर ३२ वर्षीय पेमा ध्वज लामालाई सार्वजनिक गर्‍यो।

शीर्षक जस्तै लामाको ठगी धन्दा पनि रोचक छ। विभिन्‍न फर्ममा पुगेर उनी बङ्‍गुर लिन्छन् अनि फरार हुन्छन्।

उनको यो ठगीको शैली लामो समयदेखि चलिरहेको थियो। जब उनलाई प्रहरीले पक्राउ गर्‍यो त्यसपछि खुल्यो ठगीको शैली।

‘म काभ्रे प्रहरी प्रमुख हुँदा पनि यस्तो केस आएको थियो। तर मैले त्यतिखेर खासै महत्वका साथ हेरिनँ,’ जिल्ला प्रहरी परिसर काठमाडौंका एसएसपी भूपेन्द्र खत्रीले भने।

तर जब उनी काठमाडौं प्रमुख भएर गत शुक्रबारबाट जिम्मेवारी सम्हाले त्यसपछि लामा पनि समातिए। लामाले काठमाडौं, ललितपुर, काभ्रे लगायतका बङ्‍गुर फार्ममा पुगेर ठगी गरेको देखिन्छ।

फार्ममा गएर लामाले धेरै सङ्ख्यामा बङ्‍गुर किन्छन्। मोलतोल गरेपछि गाडीमा राखेर पठाउँछन्। तर पैसा तिर्ने बेलामा एटीएम जाने भन्दै निस्किन्छ। त्यसपछि उनी बेपत्ता हुन्छन्।

उनले अहिलेसम्म ४४ लाख रुपैयाँको बङ्‍गुर लिएर फरार भएको उजुरी परेको छ। ५ जनाले प्रहरीमा निवेदन दिएका छन्।

‘यसमा अरु पनि ठगिएका हुन सक्ने आँकलन हाम्रो छ,’ एसएसपी खत्रीले भने।