१५ वैशाख, एजेन्सी । हङ्गेरीका शीर्ष सेना प्रमुखलाई राष्ट्रपतिको आदेशअनुसार बिहीबार पदमुक्त गरिएको छ । उनलाई हटाइनुको कारण खुलाइएको छैन ।

गत जनवरीमा प्रधानमन्त्री भिक्टर ओर्बानको सरकारले पारित गरेको कानुनअनुसार रक्षामन्त्रीले ४५ वर्षभन्दा माथिका कुनै पनि व्यक्तिलाई बर्खास्त गर्न सक्ने व्यवस्था भएपछि यस वर्ष सयौं वरिष्ठ अधिकारी र सैन्य गुप्तचर अधिकारीलाई बर्खास्त गरिएको छ ।

सरकारले सशस्त्र बललाई पुनर्जीवित गर्न चाहेको बताइरहँदा विपक्षी दलहरूले पश्चिमा उन्मुख नेटो समर्थक अधिकारीहरूलाई प्रतिस्थापन गर्ने उद्देश्यले सैनिकलाई ‘शुद्धीकरण’ गर्न खोजिएको बताएका छन् ।

हङ्गेरीका राष्ट्रपति कातालिन नोभाकले हस्ताक्षर गरेको आदेशमा भनिएको छ, “अप्रिल २७ देखि लागू हुने गरी मैले हङ्गेरीको रक्षा बलका कमान्डर लेफ्टिनेन्ट जनरल रोमुलुस्ज रूसिन–सेन्डीलाई पदबाट बर्खास्त गरेको छु ।”

रूसिन–सेन्डीले ‘अर्को क्षेत्रमा आफ्नो देशको सेवा गरिरहने’ विज्ञप्तिमा उल्लेख छ । यो कदम यस वर्ष सेनाका वरिष्ठ दर्जाहरूमा उथलपुथलपछि आएको छ । कदमले हङ्गेरीको रक्षा खर्चलाई बढाएको छ सेनामा ‘प्रदर्शनमा निर्भर प्रतिस्पर्धात्मक स्थिति’ सिर्जना गर्न चाहेको बताएको छ ।

एटलात्स्जो इन्भेस्टिगेसन साइटले बिहीबार एक भिडियो सार्वजनिक गरेको छ जसमा गत फेब्रुअरीमा हङ्गेरीको ग्योर–पर विमानस्थलमा छिमेकी देश युक्रेनका लागि उडेका हेलिकप्टरहरूको भिडियो खिचिएको थियो ।

यसै महिनाको सुरुमा अमेरिकी समाचार संस्था पोलिटिकोले हङ्गेरीले आफ्ना मित्रराष्ट्रहरूलाई युक्रेनमा हतियार ओसारपसार गर्न गोप्य रूपमा आफ्नो हवाई क्षेत्र प्रयोग गर्न दिइरहेको हुन सक्ने अपुष्ट अमेरिकी सैन्य गुप्तचर दस्तावेजहरू चुहिएको बताएको थियो ।

युक्रेनको रक्षा मन्त्रालयले उक्त रिपोर्टको खण्डन गर्दै युक्रेनका लागि बनाइएका हेलिकप्टरलाई हङ्गेरीको हवाई क्षेत्र प्रयोग गर्न अनुमति नदिइएको बताउँदै आएको थियो ।

आक्रमणपछि रूससँग घनिष्ठ आर्थिक सम्बन्ध कायम गर्दै आएका ओर्बानको नेतृत्वमा हङ्गेरीले युक्रेनलाई सैन्य सहायता पठाउन वा सैन्य उपकरणलाई आफ्नो भूमिमा प्रवेश गर्न दिन अस्वीकार गरेको थियो ।