३० चैत्र, काठमाडाैँ । त्रिभुवन अन्तर्राष्ट्रिय विमानस्थलमा यात्रुका लगेज ओसारपसार गर्ने नेपाल वायु सेवा निगमका कर्मचारीले खल्ती भएका लुगा लगाउन नपाउने भएका छन् ।

यात्रुहरूको लगेज फुटेकोजस्ता गुनासा आएपछि निगमले कर्मचारीलाई अबदेखि खल्ती भएको लुगा लगाउन रोक लगाएको हो । त्यस्तै, ब्यागेज ओसारपसार गर्ने ट्रलीहरूमा बार तथा चेन समेत लगाइएको छ ।

निगमले लगेजसम्बन्धी गुनासा सुनुवाइका लागि विमानस्थलको ब्यागेज ह्याण्डलिङ युनिटलाई सक्रिय गराएको छ ।

त्रिभुवन अन्तर्राष्ट्रिय विमानस्थलमा यात्रुका ब्यागेज नै च्यातेर सामानहरू हराउने समस्या पुरानै हो । मुख्यगरी विदेशबाट आएका मानिसहरूको सामान हराउने गुनासो दैनिक जसो नै आउने गरेको छ ।