२१ चैत्र, चितवन । राष्ट्रिय स्वतन्त्र पार्टीको तर्फबाट चितवन क्षेत्र नम्बर २ का उम्मेदवार रवि लामिछानेविरुद्ध उजुरी परेको छ । लामिछानेविरूद्ध युवराज पौडेल (सफल) चितवन क्षेत्र नम्बर २ स्थित निर्वाचन अधिकृतको कार्यालयमा उजुरी दर्ता गरेका हुन् ।

उनले उजुरीमा नेपालको संविधान २०७२ को धारा २९१ ले विदेशको आवासीय अनुमतिपत्र त्याग गरेको व्यक्तिले कम्तीमा तीन महिना अवधि व्यतित नभइ निर्वाचनमा उम्मेदवार हुन रोक लगाएको दाबी गरेका छन् ।

रवि लामिछानेले माघ १५ गते काठमाडाैँ जिल्ला प्रशासन कार्यालयबाट पुनः नेपाली नागरिकता प्राप्त गरेका थिए । सो दिनबाट गणना गर्दा बैशाख १० गते हुने उपनिर्वाचन तीन महिनाभन्दा कम हुने देखिएको छ ।

सफलले उजुरीमा लामिछानेको उम्मेदवारी बदर गरी उम्मेदवार बन्न अयोग्य रहेको घोषणा गर्न माग गरेका छन् । लामिछानेले सोमबारमात्रै उपनिर्वाचनका लागि उम्मेदवारी दर्ता गराएका छन् ।