भक्तपुर । काठमाडौँबाट करिब ३२ किलोमिटर पूर्वमा पर्ने नेपालकै सबैभन्दा लोकप्रिय पर्यटकिय गन्तव्य मध्यको एक गन्तव्य हो नगरकोट। भक्तपुर जिल्लाको चाँगुनारायण नगरपालिकामा अवस्थित यस पर्यटकिय क्षेत्रमा देश तथा विदेशबाट दैनिक धेरै जना पर्यटकहरु आउने गर्छन्।

आन्तरिक पर्यकटको आकर्षक नयाँ गन्तव्य बनेको छ भक्तपुर चाँगुनारायणस्थित ‘रानी झुलाको वनपँधेरो झोलुङ्गे पुल । जुन काठमाडौँबाट २५ किलोमिटर टाढा रहेको छ । ‘रानी झुला’ चाँगुनारायण नगरपालिकाको वडा नं ६ र ७ जोड्ने झोलुङ्गे पुल हो ।

त्यहाँका वासिन्दाहरुलाई आवतजावत गर्न सहज होस् भनि बनाएको उक्त झोलुङ्गे पुल आन्तरिक पर्यकटका लागि नयाँ आकर्षक गन्तव्य बन्न पुगेको छ । यहाँबाट चाँगुनारायण नगरपालिका–८ सुडालमा रहेको बोझिनी ड्याम सम्मकाे यात्रा समेत राेमान्चित छ ।

त्यहाँ रहेको हरियाली जंगल र सल्लाको सुगन्धले मानिसलाई लोभ्याउँछ । २५० मिटर लामो झोलुङ्गे पुलको बीचमा जाँदा साच्चै नै रमाइलो महसुस हुन्छ, सरर चिसो हावा, पुलबाट तल हेर्दा हरियाली जंगल, माथि पहाडबाट बगेर आएको पानीको बहाबको छङछङको आवाज सुन्दा एकछिन मनै फुरुङ्ग हुन्छ । सारा पीडा आफैँ हराएर जान्छ ।