काठमाडाैं । सत्तारुढ घटक राष्ट्रिय स्वतन्त्र पार्टीका सांसदहरू नेपाली राष्ट्रिय क्रिकेट टीमको समर्थनमा जर्सी लगाएर संसद बैठकमा पुगेका छन् । १० वर्षपछि टी-२० विश्वकप खेल्न लागेको नेपालको पहिलो खेल नेदरल्यण्ड्ससँग छ ।

सांसद् निशा डाँगी भन्छिनः आज नेपालले क्रिकेटको महासङ्ग्राम टि-ट्वेन्टी विश्वकप २०२४ मा आफ्नो पहिलो खेल खेल्दैछ। पारस खड्काको नेतृत्वमा १० वर्षअघि विश्वकपमा सहभागी नेपाली टिमको प्रदर्शन टेलिभिजनमा हेरेर हुर्किएको पुस्ताले आज नेपालको प्रतिनिधित्व गर्दै विश्वकप खेल्दैछन्।

यो १० वर्षमा एउटा सिङ्गो पुस्ता हुर्किएको छ, हाम्रो सपना हुर्किएको छ। खेलकुदको विश्वमञ्चमा नेपालको सशक्त चिनारी दिने अवसर हामीले पाएका छौँ। यो आफैँमा एउटा जीत हो। नेपाली राष्ट्रिय पुरुष क्रिकेट टिमलाई यो उपलब्धिका लागि अत्यन्तै धेरै बधाई दिन चाहन्छु। तपाईँहरू निर्धक्क भएर खेल्नुहोस्, हामी सम्पूर्ण नेपाली नागरिक तपाईँहरूको साथमा छौँ।
उत्कृष्ट प्रदर्शनको शुभकामना !