काठमाडाैं । नेपाल समाजवादी पार्टीका अध्यक्ष डा. बाबुराम भट्टराईले कृष्णाबहादुर महरा पक्राउ प्रकरणमा प्रतिक्रिया दिएका छन । बुधबार पत्रकार सम्मेलन गर्दै अध्यक्ष भट्टराईले प्रतिक्रिया दिएका हुन् । उनले भनेका छनः

राजनीतिक रूपमा हामीले आफ्ना मित्र र सहयात्रीहरूको संरक्षण गर्नु एउटा पक्ष हो। तर कानुनी विषयहरू उठिसकेपछि त्यस्ता विषयमा विधिसम्मत ढङ्गले अगाडि बढ्न दिनुपर्छ ।मलाई यतिबेला के सम्झना आउँछ भने पञ्चायतकालमा एकपटक राजाका एडीसी र तत्कालीन प्रहरी प्रमुख समातिएका थिए । त्यसबेला म पत्रकारितामा पनि रुचि राख्थेँ । त्यसबेला राजेश्वर देवकोटा पञ्चायतको ठुलै नेता हुनुहुन्थ्यो । उहाँको अन्तरवार्ता लिने क्रममा मैले त्यसबारे सोधेको पनि थिएँ । हामी एउटै गाउँका भएकाले पनि मलाई यो कुरा सोध्न सहज थियो ।

त्यसबारे उहाँले भन्नुभयो, ‘बाबु आफूले पालेको खसी काट्नु कुन ठुलो कुरा भयो ?’ राजाको शासनकालमा त्यो भन्दा धेरै बोल्ने कुरा त भएन । त्यसो भएकाले अहिले यी सबै प्रकरणमा पनि आफैँले पालेको खसी काटेर जोगिन खोजेका त होइन्न भन्ने आशङ्का जनतामा जन्माएको छ ।