काठमाडौं। टोखा नगरपालिकाले पटाकाजन्य पदार्थको बिक्री वितरण र प्रयोग नगर्न भनेको छ । पालिकाको तर्फबाट प्रमुख प्रशासकीय अधिकृत शेरबहादुर बि.सी.ले सूचना निकालेर पटाकाजन्य पदार्थ खरिद बिक्री वितरण र प्रयोग गरेको पाइएमा कानून बमोजिम कारबाही हुने बताएका छन् । त्यसैगरी, चाडपर्वको बेला नगर क्षेत्र भित्र शान्ति सुव्यवस्था कायम राख्नका लागि जानकारी सहित अनुरोध गरिएको सूचनामा उल्लेख रहेको छ ।

सूचनामा भनिएको छ, ‘दीपावली, नेपाल सम्वत तथा छठ पर्वको अवसरमा सम्पूर्ण टोखा नगरवासीहरूमा मङ्गलमय शुभकामना व्यक्त गर्दै उक्त पर्व हार्दिकताका साथ मनाउन अनुरोध गर्नुका साथै नगर क्षेत्र भित्र शान्ति सुव्यवस्था कायम राख्न पटाकाजन्य पदार्थ खरिद बिक्री वितरण र प्रयोग नगर्न र नगराउनु हुन तथा जुवातास नखेल्न र नखेलाउनु हुन सर्वसाधारणको जानकारीको लागि यो सूचना प्रकाशन गरिएको छ । अन्यथा कानून बमोजिम कारबाही हुने ब्यहोरा समेत अनुरोध छ ।’