२२ जेठ, काठमाडाैँ । राष्ट्रिय स्वतन्त्र पार्टीका सांसदले प्रधानमन्त्री भैँसी चढेर स्वदेश फर्किएको भनेपछि संसद् बैठकमा होहल्लाको माहोल सिर्जना भएको छ।

राष्ट्रिय स्वतन्त्र पार्टीका सांसद शिशिर खनालले प्रधानमन्त्री पोखरा विमानस्थलमा उत्रिनुहुन्छ होला भन्ने आफूहरूको अपेक्षा भए पनि भैंसी चढेर आएको भन्ने कुरा सुन्नु परेको बताएपछि माओवादी केन्द्रका प्रमुख सचेतक हितराज पाण्डेले नियमापत्ति जनाए ।

त्यसपछि सत्ता र प्रतिपक्षका सांसदले हो-हल्ला गर्न थालेपछि सभामुख देवराज घिमिरेले भैंसी चढेर आएको भन्ने शब्द संसदको रेकर्डबाट हटाउन निर्देशन दिएका छन् ।

तर, नेकपा एमालेका सांसद रघुजी पन्त र रास्वपा सांसद रवि लामिछानेले भैंसी चढेर आएको शब्द प्रधानमन्त्रीले नै पहिला बोलेको बताउँदै सो पनि हटाउन माग गरेका छन् ।

प्रधानमन्त्री प्रचण्डको भारत भ्रमणमा भारतले नेपाललाई १५ वटा मुर्रा जातीका राँगा दिने प्रतिबद्धता व्यक्त गरेको छ । तर, सामाजिक सञ्जालमा भने भैँसी दिने हल्ला फैलिएपछि अहिले यो प्रकरण सामाजिक सञ्जालमा चर्चित छ।