९ जेठ, धरान । नविल बैंकका ग्राहकको खाताबाट पैसा चोरी भएको छ । बैंकको धरान शाखाबाट २ ग्राहकहरूको पैसा चोरी भएको हो ।

उक्त शाखामा सारदा राई र श्याम थुलुङले खातामा जम्मा गरेको रकम हराएको जानकारी दिइएको छ ।  सारदा राईको खाताबाट ६६ हजार ३५० रुपैयाँ र श्याम थुलुङको खाताबाट ८० हजार रुपैयाँ चोरी भएको बताइएको छ ।

थुलुङले बैशाख ३१ गते खाताबाट रकम चोरी भएको बताए । उनले यसबारे इलाका प्रहरी कार्यालय धरानमा उजुरी दिएको पनि जानकारी दिएका छन् ।

पीडित २ जनाले नै बताए अनुसार अपरिचित व्यक्तिले बैंकबाट फोन गरेको भन्दै खाता नम्बर मागेर बैंक खाता ह्याक गरि रकम चोरी गरेका हुन् । बैंकका शाखा अधिकृत उज्वल भण्डारीले बैंकका ग्राहकहरुलाई ह्याकरले कर्मचारी बताउँदै विवरण मागी खाता ह्याक गरेर चोरी गर्ने गरेको बताएका छन् ।

भण्डारीका अनुसार बैंकको केन्द्रिय कार्यालयमार्फत ठगी गर्नेको पहचान गर्ने पहल भइरहेको छ । यस विषयमा प्रहरीले पनि अनुसन्धान गरिरहेको छ ।