२ जेठ, महोत्तरीमा । वर्षासँगै आएको हावाहुरीका कारण महोत्तरीको उत्तरी भेगमा आइतबार रातीदेखि विद्युत् सेवा अवरुद्ध भएको छ ।

हावाहुरीले उत्तरी भेगका हाइटेन्सन पोल ढालेको र रुखका हाँगा खसेर प्रसारण लाइनमा क्षति पुग्दा सेवा अवरुद्ध भएको नेपाल विद्युत् प्राधिकरण गौशाला शाखाले जनाएको छ । शाखा प्रमुख प्रवीण झाकाअनुसार बर्दिबासको वडा नं ३, १०, र ११ मा गरी १३ वटा, भंगाहामा ४ र गौशाला वडा नं ११ मा ३ वटा गरी १६ पोलमा क्षति पुगेको छ । त्यस्तै औरही, निगौल चौक, रामनगरलगायत सय बढी ठाउँमा रुखका हाँगा खसेर प्रसारण लाइनमा क्षति पुर्‍याएपछि समस्या भएको छ ।

मर्मत कार्य भइरहेकोले आज (मंगलबार) साँझसम्म सबै ठाउँमा सेवा सुचारु हुने झाले बताए ।