१८ वैशाख, काठमाडाैँ । एसिसी प्रिमियर कप अन्तर्गत नेपाल र युएईबिचको फाइनल खेल स्थगित भएको छ । वर्षाका कारण खेल नहुने भएपछि आजका लागि खेल स्थगित गरिएको हो ।

टियु क्रिकेट मैदानमा टस हारेर पहिला ब्याटिङ गरेको युएईले कमजोर प्रदर्शन गर्दै २७.३ ओभरमा ९ विकेट गुमाउदै १ सय ६ बनाएको छ ।

मंगलबार आजकै स्थितिबाट खेल पुनः सुरू हुनेछ । अर्थात् मंगलबार युएईले बिहान ९ बजे १०६–९ को अवस्थाबाट खेल सुरु गर्नेछ ।

भोली पनि वर्षाका कारण खेल हुन नसके सुपर ओभरबाट नतिजा निकालिनेछ । यदि सुपर ओभर पनि सञ्चालन नहुने भएमा यो खेल नतिजाविहीन हुँदा नेपाल एसिया कपमा पुग्नेछ ।

खेल रद्द हुँदा ओडिआई वरियताको कारण नेपाल एसिया कपमा पुग्ने समीकरण बन्नेछ । नेपाल ओडिआई वरियाता १४ औं र युएई १९ औं स्थानमा छन् ।