१८ वैशाख, काठमाडाैँ । राष्ट्रिय स्वतन्त्र पार्टी (रास्वपा)ले सरकारमा सहभागी हुने कि नहुनेबारे निर्णय शुक्रबार मात्रै लिने भएको छ ।

सोमबार पार्टी कार्यालय बसुन्धारामा बसेको केन्द्रीय कमिटिको बैठकमा केन्द्रीय सदस्यहरूले आ-आफ्ना धारणा राखेको र शुक्रबार निर्णय लिइने महामन्त्री डा. मुकुल ढकालले जानकारी दिएका छन् ।

‘पार्टी सरकारमा जाने वा नजानेबारे आगामी शुक्रबार केन्द्रीय समिति र संसदीय दल बैठक गरेर निर्णय लिन्छौं। सरकारमा जाने कि प्रतिपक्षमा बस्ने निर्णय वैशाख २२ गते हुन्छ।’ उनले भने ।

रास्वपा सरकारमा सहभागी नभएता पनि समर्थन भने गरिरहेको छ ।

आइतबार प्रधानमन्त्री प्रचण्ड र रास्वपाका सभापति रवि लामिछानेबिच भेटवार्ता भएको थियो । उक्त भेटमा सरकारमा सहभागी हुन प्रचण्डले सभापति लामिछानेसँग धारण व्यक्त गरेका थिए ।