काठमाडाैँको कपनस्थित सरस्वतीनगरमा निरा पाण्डे आचार्यको हत्या आरोपित सार्वजनिक भएका छन् । केन्द्रीय अनुसन्धान ब्युरोले आइतबार पत्रकार सम्मेलन गर्दै पक्राउ परेका बिनोद विकलाई सार्वजनिक गरेको हो ।

ब्युरोले दिएको जानकारी अनुसार विकले निराको पसलमा नै भएको हतियार प्रयोग गरेको पाइएको छ । आरोपितले हत्या गरी पसलमा भएको १०००-१२०० रूपैयाँ र निराले लगाएको सुनको सिक्री लुटेका थिए । उनले लुटेर बिक्री गरेको सिक्री समेत प्रहरीले बरामद गरेको छ ।

आरोपित विक हत्या गरिसकेपछि सफा टेम्पो चढेर चाबहिलसम्म गएको र त्यहाँबाट मोटरसाइकल प्रयोग गरी भक्तपुर लोकन्थली गएको पाइएको छ। त्यसको भोलिपल्ट उनी झापा गएका थिए ।

अनुसन्धानमा खटिएको प्रहरीको टोलीले शनिबार राती करिब १० बजे झापामा साथिको कोठामा लुकिराखेको अवस्थामा विकलाई पक्राउ गरि काठमाडाैँ ल्याएको हो ।

अनुसन्धान ब्युरोले थप अनुसन्धान गर्दै जाने र थप जानकारी प्राप्त भएपछि सार्वजनिक गरिने बताएको छ। अहिलेसम्मको अनुसन्धानले हत्या प्रकरणमा उनी एक जना मात्रै संलग्न रहेको पाइएको छ ।